Menu

অসমৰ বিষয়ে ১০টা যোগাত্মক কথা

শান্তি নিকেতনৰ ভাস্কৰ্যশিল্পী ৰামকিংকৰ বেইজে অসমৰ ভাস্কৰ চালেহা আহমেদক কৈছিল, ‘কি নাই তোমার দেশে– যেখানে সূৰ্য উঠে অনেক আগে’ | সঁচাই কি নাই অসম দেশত ! আৰু চালেহা আহমেদেও অসমৰ প্ৰাকৃতিক সম্পদৰ পৰাই সৃষ্টিকৰ্মৰ আহিলা পাইছিল| সৃষ্টিকৰ্মৰ উৎসও আছিল অসমৰ লোক-কলা, লোক-সংস্কৃতি | অসমৰ কাঠ-বাঁহ, মাটি, গছৰ শুকান ফুল, ডাল-পাত আদিও হ’ব পাৰে হস্তশিল্পৰ আধাৰ | হস্তশিল্প তথা কুটীৰ শিল্পত পূৰ্বৰে পৰাই অসমখন চহকী | প্ৰায়বোৰ ক্ষুদ্ৰ উদ্যোগেই অসমত বৰ্তমান আছে| এইবোৰ থলুৱাভাৱেই তৈয়াৰ হয়| ইয়াৰ বাবে প্ৰয়োজনীয় কেঁচামালো অসমতে আছে |

অসমৰ মাটি মৃৎশিল্পৰ বাবে উপযোগী | অসমৰ ধুবুৰী জিলাৰ আশাৰীকান্দিৰ মৃৎশিল্পই ভাৰতৰ সৰ্বোৎকৃষ্ট মৃৎশিল্পৰূপে খ্যাতি অৰ্জন কৰিছে আৰু জাপান, ইংলেণ্ড, ইটালী, জাৰ্মানী, আমেৰিকা আদি দেশতো সমাদৃত হৈছে| এয়া সম্ভৱ হৈছে উন্নত মানৰ ছ’ডিয়াম ছিলিকেট মিশ্ৰিত আৰু স্থিতিস্থাপকতাযুক্ত মাটিৰ  বাবে| বিশেষকৈ মাজুলী, আশাৰীকান্দিৰ মাটি উল্লেখনীয় ৷ শিলাই নদীৰ পাৰৰ প্ৰায় ৫৯৯ বিঘা মাটি ‘হীৰামাটি’ নামেৰে প্ৰখ্যাত আৰু ই মৃৎশিল্পৰ প্ৰধান উপাদান | অসমৰ সত্ৰীয়া সংস্কৃতিৰ অন্যতম অৱদান হ’ল মুখাশিল্প| মুখাশিল্পৰ এটা উল্লেখনীয় কথা হ’ল– সজাই থ’লেই ভাস্কৰ্য আৰু পৰিধান কৰিলে মুখা হৈ পৰে৷ মহাপুৰুষ শ্ৰীমন্ত শংকৰদেৱে শুভাৰম্ভ ঘটোৱা মুখাশিল্প ইতিমধ্যে দেশ-বিদেশতো জনাজাত হৈ পৰিছে |

অসমৰ প্ৰধান খেতি হ’ল ধান| এই ধান খেতিৰ পৰাই নানা উদ্যোগ গঢ় লৈ উঠিছে | ধানৰ নৰাৰ পৰা কাগজৰ বোৰ্ড, ধানৰ খহটা তূুঁহৰ পৰা ডিটাৰজেণ্ট পাউদাৰ, মিহি তুঁহৰ পৰা ৰাইচব্ৰান অইল, ছ’ডিয়াম ছিলিকেট আদি প্ৰস্তুত কৰাৰ উদ্যোগ স্থাপন হৈছে | তদুপৰি ধানৰ মিল, চিৰাৰ মিল আৰু উখোৱা চাউলৰ মিল স্থাপন হৈছে | অসমৰ সুগন্ধি জহা চাউলে ইয়াৰ ব্যতিক্ৰমী গোন্ধ আৰু স্বাদৰ বাবে ইতিমধ্যে বিশ্বৰ বজাৰত জনপ্ৰিয়তা লাভ কৰিছে আৰু অচিৰেই ই বিশ্বৰ প্ৰায়বোৰ বিলাসী হোটেল-ৰেষ্টুৰেণ্টৰ অভিজাত খাদ্য-তালিকাত স্থান লাভ কৰিব | উল্লেখ্য যে সুগন্ধি জহা ধানৰ একাধিক প্ৰজাতি মাত্ৰ অসমতহে আছে | ২০০৬ চনত ৰাজ্যখনৰ ৯২ হেক্টৰ মাটিত জহা ধানৰ খেতি কৰা হৈছিল আৰু প্ৰকল্পটোত ১৬২গৰাকী খেতিয়ক জড়িত আছিল | উৎপাদন হৈছিল ১৩৩ মেট্ৰিকটন জহা চাউল | বৰ্তমান সমত চৰকাৰী আৰু বেচৰকাৰীভাৱে সৰ্বমুঠ ১৭,৪৫০ হেক্টৰ মাটিত জহা ধানৰ খেতি কৰা হয়| অসমত ছটা প্ৰজাতিৰ জহা ধানৰ খেতি হয় যদিও কুনকুনি জহাৰহে চাহিদা বেছি | বাচমতিৰ পাছতে অসমৰ জহাই দ্বিতীয় সুগন্ধি স্বাদযুক্ত চাউল | জাৰ্মানীত অনুষ্ঠিত বায়’-ফেক (BIO-FACH) শীৰ্ষক কৃষি মেলাত অসমৰ সুগন্ধি জহাই কৃষিজাত সামগ্ৰী আমদানি কৰা ইউৰোপৰ ব্যৱসায়ীমহলৰ দৃষ্টি আকৰ্ষণ কৰিবলৈ সমৰ্থ হৈছিল |

ধানৰ পাছতে চাহ খেতি অসম তথা ভাৰতৰ সৰ্ববৃহৎ কৃষি উদ্যোগ| চাহ খেতিৰ উদ্যোগে আন কেতবোৰ সহযোগী উদ্যোগ গঢ়ি তুলিছে| নিম্ন মধ্যবিত্তৰ পৰা উচ্চ শ্ৰেণীলৈকে বুজনসংখ্যক লোক এই উদ্যোগত জড়িত হৈ আছে | অসমত ৮৫৫ খনতকৈও অধিক পঞ্জীয়নভুক্ত চাহ বাগিচা আছে ৷ ক্ষুদ্ৰ চাহ খেতিয়কসকলে কৰ্মসংস্থানৰ লগতে স্বাৱলম্বী হ’বলৈও আদৰ্শ দেখুৱাইছে৷ তদুপৰি চাহ খেতিৰ প্ৰশিক্ষণ দিব পৰা প্ৰতিষ্ঠানো অসমতে আছে | সেই প্ৰতিষ্ঠানত প্লেণ্টেশ্যন, মাৰ্কেটিং, পেকিং, ৰিছাৰ্চ আদি বিষয় আছে |

অসম অলৱণীয় পানীৰ উৎস আৰু অলৱণীয় পানীত বিচৰণ কৰা মাছৰ চাহিদাই সৰ্বাধিক | বৰ্তমান বিশ্বত ৫০০ মান একুৱাৰিয়ামত ৰাখিব পৰা আলংকাৰিক মাছ আছে | অসমৰ থলুৱা ৰংচঙীয়া পুঠি, গৰৈ, চেঙেলী, খলিহনা, বতীয়া, বামী, গঙ্গাটোপ, কান্ধুলি আদিয়েও আলংকাৰিক মাছৰ স্থান লাভ কৰিছে | অসমৰ প্ৰকৃতিপ্ৰদত্ত জলাশয় মীন পামৰ অন্যতম উৎস | প্ৰতি বছৰে মীন পোহা দেশৰ ভিতৰত অসম দ্বিতীয় স্থানত | মৎস্য সম্পদত চহকী অসমত মীন পাম, উদ্যোগ আদিৰ প্ৰচুৰ সম্ভাৱনা আছে |

ধাতু শিল্পৰ ভিতৰত অসমৰ কাঁহ-পিতল আৰু স্বৰ্ণশিল্পই প্ৰধান | সপ্তদশ শতিকাত আহোম স্বৰ্গদেউ শিৱসিংহই নলবাৰীৰ জীউধন কঁহাৰক ১০০ পুৰা নিস্কৰ ভূমি দান কৰি সৰ্থেবাৰীত সূচনা কৰা কাঁহশিল্প আজিও জীয়াই আছে | কাঁহৰ বাচনৰ চাহিদা অসমকে ধৰি পশ্চিমবংগতো আছে | এই চাহিদা পূৰণৰ বাবে নৱ-প্ৰজন্মই পদক্ষেপ ল’লে শিল্পটো জীয়াই থকাৰ লগতে অসমীয়া সংস্কৃতিও ৰক্ষা হ’ব |

অসমৰ নগাঁও, বৰপেটা, গোৱালপাৰা আৰু দৰং জিলাত মৰাপাটৰ উৎপাদন ভাল হয় | মৰাপাটৰ পৰা উৎপাদিত (বস্তা, বেগ, ৰছী, দলিচা, গৃহসজ্জাৰ বস্তু) সামগ্ৰী আদিৰ যথেষ্ট চাহিদা আছে ৷ মৰাপাটৰ সূতাৰ পৰা বিভিন্ন ব্যৱহাৰ্য সামগ্ৰী প্ৰস্তুত কৰাৰ উপৰি বগা কোমল কাণ্ড অংশ ইন্ধন আৰু ডাঠ কাগজ প্ৰস্তুত কৰাত ব্যৱহাৰ হয় | পুলি অৱস্থাত শাকৰূপে খাবও পাৰি ৷ বীজৰ পৰা আহৰণ কৰা তেল ৰং আৰু বাৰ্নিছত ব্যৱহাৰ হয়| উদ্যোগ হিচাপে মৰাপাট শিল্প চৰকাৰৰ টেক্সটাইল বিভাগৰ সৈতে জড়িত আৰু ২০০৬ চনত মৰাপাটৰ মূল্য প্ৰতি কুইণ্টলত প্ৰায় ১,০০০ টকা এই বিভাগে ধাৰ্য কৰি দিছিল | আনাৰস, কল, নাৰিকল, তামোল গছৰ পৰাও অাঁহ উলিয়াই কম খৰচতে উদ্যোগ স্থাপন কৰিব পাৰি ৷ অসমত এইবোৰৰ খেতি প্ৰচুৰ পৰিমাণে হয় |

কৃত্ৰিম সুগন্ধিতকৈ প্ৰকৃতিগত, উদ্ভিদজাত সুগন্ধিৰ চাহিদা অধিক | অসমতে আছে বিভিন্ন প্ৰজাতিৰ সুগন্ধি উদ্ভিদ | সত্তৰৰ দশকতে চিত্ৰনলাৰ খেতিৰে অসমত উদ্যোগ গঢ়ি উঠিছিল | এই খেতিৰ বাবেও অসমৰ মাটি উপযুক্ত | চিত্ৰনলা খেতি কৰি চিত্ৰনলা তেল উৎপাদন কৰিব পাৰি ৷ এই তেলৰ চাহিদাও বেছি | ঔষধ-সুগন্ধি গছ-বন-লতাৰ ভঁৰাল অসমখন | যোৰহাট আঞ্চলিক গৱেষণাগাৰ (বৰ্তমান ‘নৰ্থ-ইষ্ট ইন্ষ্টিটিউট অৱ ছায়েন্স এণ্ড টেকন’লজী)ত উদ্ভাৱন কৰা কৃষি-পদ্ধতিৰে ঔষধি-সুগন্ধি গছ-বন-লতাৰ খেতি কৰি, উদ্যোগ স্থাপন কৰিব পাৰি ৷ এইবোৰৰ ভিতৰত চিত্ৰনলা প্ৰধান | ভাৰতৰ ৯০ শতাংশ চিত্ৰনলা তেল উত্তৰ-পূৰ্বাঞ্চলতে উৎপাদন হয় | এক হেক্টৰ মাটিত ১৫ হাজাৰমান টকা বিনিয়োগেৰে চিত্ৰনলাৰ খেতি কৰি ৫৫ হাজাৰতকৈও অধিক টকা লাভ কৰিব পাৰি ৷ চিত্ৰনলাৰ লগতে কোটাহী বেঙেনা, ব্ৰাহ্মী, অশ্বগন্ধা, ডালচেনি, পেপাৰমিণ্ট, লেমন গ্ৰাছ, পালম’ৰজা, ডাইছ’কৰীয়া আদিৰ খেতিৰে তেল নিস্কাষণ কৰি লাভৱান হ’ব পাৰি ৷ পদিনা, তুলসী, মচলাজাতীয় উদ্ভিদ হ’লেও সুগন্ধিৰ অন্তৰ্ভুক্ত|

বিভিন্ন ঋতুত হোৱা দেশী-বিদেশী ফুলৰ বাবেও অসমৰ মাটি-পানী-জলবায়ু উপযোগী | কম মাটিতে বছৰৰ বাৰ মাহতেই বিভিন্ন ফুলৰ খেতি কৰিব পাৰি ৷ প্ৰতি বছৰে বাঢ়ি অহা চাহিদালৈ চাই ক’ব পাৰি বাণিজ্যিকভাৱে ফুলৰ খেতি কৰি ফুলভিত্তিক উদ্যোগ গঢ়ি তুলিব পাৰি ৷ ফুলৰ লগতে অন্তৰ্ৱৰ্তী শস্য (ৰঙালাও, তিল, ধনীয়া, পালেং, বাবৰ, পিঁয়াজ, বিলাহী আদি)ৰ খেতি কৰিও লাভৱান হ’ব পাৰি ৷

অসমৰ নৈৰ বালি-চাপৰিত হোৱা কঁহুৱা, ঝাওবন, হাবিৰ নল-খাগৰি, পথাৰৰ কলমৌ, পানীমেটেকা আদি কেঁচামালৰূপে ক্ষুদ্ৰ আৰু মজলীয়া উদ্যোগত ব্যৱহাৰ হয় | অসমৰ হাবিত কিছুমান বিশেষ উদ্ভিদ আছে যিবোৰৰ পাত, ফুল-ফল, বাকলি, শিপা আদিৰ পৰা ৰং আৰু ৰঞ্জক পাব পাৰি ৷

আজিৰ অসমখন বিভিন্ন সমস্যাৰে জৰ্জৰিত | ইয়াৰে এটা প্ৰধান সমস্যা নিৱনুৱা সমস্যা | ভাৰতৰ সূৰ্য উঠা দেশ অসমত নাই কি? তাৰে মাত্ৰ ১০টা যোগাত্মক দিশ উল্লেখ কৰি নিৱনুৱা সমস্যা সমাধানৰ পথ দেখুওৱা হ’ল | নৱ-প্ৰজন্মই অসমৰ প্ৰাকৃতিক সম্পদক মূলধনৰূপে লৈ একাগ্ৰতাৰে আগ বাঢ়িলে সাফল্যই আহি দুৱাৰমুখত থিয় দিবহি |

(‘জীৱন’ৰ দশকপূৰ্তি উপলক্ষে আয়োজিত ‘অসমৰ বিষয়ে ১০টা যোগাত্মক কথা’ বিষয়ক প্ৰতিযোগিতাত প্ৰথম স্থানপ্ৰাপ্ত)

অঞ্জু শাণ্ডিল্য

Comments

লাহে লাহে তেওঁৰ প্ৰতি মোৰ আকৰ্ষণ বাঢ়ি আহিছিল

উচ্চতৰ মাধ্যমিকত নামভৰ্তি হোৱাৰ পাছত মই নজনাকৈয়ে পঢ়াৰ ধাউতি বাঢ়ি গৈছিল।…

আমাৰ নিঠৰ দেহ বিচাৰি নাপালেহেঁতেন

আন দহজনে নকৰা কিছু কাম কৰাৰ মন সৰুৰে পৰা আছিল যদিও সময়, সুবিধা…

সেই দিনটোৰ পৰা বিহু সন্মিলনলৈ যোৱা নাই

১৯৬৬ চনৰ কথা ৷ সেই সময়ত ড: ভূপেন হাজৰিকাৰ নাম চাৰিওফালে ৰজনজনাই আছিল…