Menu

চানমাৰিলৈ গৈছে যদি, জানি লওক এই ১৮টা কথা

গুৱাহাটীৰ চানমাৰিৰ ৰাজপথতেই ১৯৮০ চনৰ ২৩ এপ্ৰিলত ছাত্ৰকৰ্মী দুলাল শৰ্মাই ব্লেডেৰে বুকু ফালি সেই তেজেৰে লিখিছিল ‘তেজ দিম, তেল নিদিওঁ’৷ অসমৰ খাৰুৱা তেল বহি:ৰাজ্যলৈ নিয়া কাৰ্যৰ প্ৰতিবাদ কৰিছিল তেওঁ৷ এই দু:সাহসিক কাৰ্যৰ স্মৃতিত সেই স্থানত স্থাপন হৈছে সুদৃশ্য স্মাৰক৷

 

আমিও জানি নাজানি নলওঁ গম৷ গুৱাহাটীৰ মাজমজিয়াৰ চানমাৰি৷ কিমান ইতিহাস কিমান বৰ্তমানৰ সাক্ষী৷ অসমৰ বৌদ্ধিক প্ৰাণকেন্দ্ৰ৷ এই চানমাৰিৰ বিষয়ে অন্তত: এই ১৮টা কথা জানেনে আপুনিও?

১৷ গুৱাহাটীৰ চানমাৰিৰ ৰাজপথতেই ১৯৮০ চনৰ ২৩ এপ্ৰিলত ছাত্ৰকৰ্মী দুলাল শৰ্মাই ব্লেডেৰে বুকু ফালি সেই তেজেৰে লিখিছিল ‘তেজ দিম, তেল নিদিওঁ’৷ অসমৰ খাৰুৱা তেল বহি:ৰাজ্যলৈ নিয়া কাৰ্যৰ প্ৰতিবাদ কৰিছিল তেওঁ৷ এই দু:সাহসিক কাৰ্যৰ স্মৃতিত সেই স্থানত স্থাপন হৈছে সুদৃশ্য স্মাৰক৷

২৷ গুৱাহাটী বিশ্ববিদ্যালয়ৰ পুথিভড়াল ১৯৪৮ চনত চানমাৰিত স্থাপন হৈছিল৷ বৰ্তমান এই ঠাইখণ্ডক পুৰণি গুৱাহাটী বিশ্ববিদ্যালয় আৱাসিক চৌহদ (অ’ল্ড ইউনিভাৰ্ছিটী কলনী) নামেৰে জনা যায়৷ পিছলৈ এই পুথিভড়াল জালুকবাৰীস্থিত বিশ্ববিদ্যালয় চৌহদলৈ স্থানান্তৰ কৰা হয়৷

৩৷ ১৯৯৬ চনৰ ১৭ মে’ত এই চানমাৰিতেই শেষ নিশ্বাস ত্যাগ কৰিছিল সাংবাদিক পৰাগ কুমাৰ দাসে৷ সাংবাদিকগৰাকীক দিন দুপৰতে সেই সময়ত চানমাৰিত থকা অসম জাতীয় বিদ্যালয়ৰ সন্মুখত আততায়ীয়ে নিচেই কাষৰ পৰা গুলিয়াই হত্যা কৰিছিল৷ এই ঠাইত এতিয়া তেওঁৰ এটি প্ৰতিমূৰ্তি স্থাপন কৰা হৈছে আৰু প্ৰতি বছৰে তাত আয়োজন কৰা হয় স্মৃতিচাৰণ৷

৪৷ আকাশবাণী গুৱাহাটী কেন্দ্ৰ ১৯৫৭ চনৰ পৰাই চানমাৰিৰ অন্যতম অংগ৷ এই চৌহদতেই সৃষ্টি হৈ আহিছে অসমৰ অগণন কালজয়ী গীত, নাটক আদি৷

৫৷ এই চানমাৰিৰ অন্যতম আকৰ্ষণ ইংৰাজী ইউ আখৰৰ আৰ্হিৰ আনন্দৰাম বৰুৱা উৰণ সেঁতু৷ এই উৰণ সেঁতু সন্ধিয়াৰ গুৱাহাটীৰ জনপ্ৰিয় আড্ডা পইণ্ট৷

৬৷ চানমাৰি উৰণ সেঁতুৰ তলতে থকা অসম অভিযান্ত্ৰিক প্ৰতিষ্ঠান ১৯৪৮চনত প্ৰতিষ্ঠিত আৰু ই উত্তৰ-পূব ভাৰতৰ কাৰিকৰী শিক্ষাৰ অন্যতম পুৰণি কেন্দ্ৰৰূপে জনাজাত৷

৭৷ এই প্ৰতিষ্ঠানৰ খেলপথাৰত ১৯৬১ চনৰ পৰা অনুষ্ঠিত হৈ আহিছে পূব গুৱাহাটী বিহু সন্মিলন৷

৮৷ ইয়াতেই বিগত কেইবাবছৰো ধৰি অনুষ্ঠিত হৈ আহিছে উত্তৰ পূব গ্ৰন্থমেলা আৰু অসম প্ৰকাশন পৰিষদৰ গুৱাহাটী গ্ৰন্থমেলা৷

৯৷ অসমৰ আইন শিক্ষাৰ অন্যতম কেন্দ্ৰ জ্ঞানদাভিৰাম বৰুৱা আইন মহাবিদ্যালয় এই চানমাৰিতেই ১৯৬৯ চনত স্থাপন হৈছিল৷

১০৷ পুৰণি চানমাৰিৰ প্ৰাক আহোম যুগৰ ৰাম ৰায় দিঘী নামৰ বিলখনৰ ঠাইতে বৰ্তমান জিলিকি আছে উত্তৰ পূব ভাৰতৰ বাণিজ্য শিক্ষাৰ প্ৰধান কেন্দ্ৰ গুৱাহাটী কমাৰ্চ কলেজ৷

১১৷ গোৱালপৰীয়া লোকগীতৰ সম্ৰাজ্ঞী প্ৰতিমা পাণ্ডে বৰুৱা, শিল্পী জয়ন্ত হাজৰিকা আৰু পণ্ডিত আনন্দৰাম বৰুৱাৰ আবক্ষ মূৰ্তিয়ে চানমাৰিক অসমৰ বৌদ্ধিক মানচিত্ৰত সুকীয়া বৈশিষ্ট্যৰে উদ্ভাসিত কৰিছে৷

১২৷ ১৯৮৮ চনৰ পৰা সাদিন গোষ্ঠী সগৌৰৱেৰে মূৰ-দাঙি আছে চানমাৰিত৷ এই গোষ্ঠীৰ পৰা প্ৰকাশিত ‘অসমীয়া প্ৰতিদিন’ অসমৰ সৰ্বকালৰ সৰ্বাধিক বিক্ৰী হোৱা দৈনিক কাকত৷

১৩৷ ১৯৩৯ চনৰ পৰাই চানমাৰিৰ চিনাকি আসাম ট্ৰিবিউন গোষ্ঠী৷ সংবাদ জগতত বিভিন্ন দিশেৰে এই গোষ্ঠী ব্যতিক্ৰম৷ তাৰে এটা হৈছে ভাৰতৰ ভিতৰতে সৰ্বপ্ৰথমে সাংবাদিক আৰু সংবাদকৰ্মীৰ বাবে মাজিথিয়া দৰমহা আয়োগৰ পৰামৰ্শাৱলী কাৰ্যকৰীকৰণ৷

১৪৷ এই অঞ্চলতে আছে তীৰ্থনাথ শৰ্মা সভাগৃহ, পেঞ্চনাৰ ভৱন, শিক্ষক ভৱন আদিৰ দৰে অনুষ্ঠান৷

১৫৷ ড: ভূপেন হাজৰিকাৰ ঘৰ তথা সৃষ্টিৰ কঠিয়াতলী এই চানমাৰিৰে নিজৰাপাৰত অৱস্থিত৷

১৬৷ অসমৰ জনসমাজক বৌদ্ধিকভাৱে আলোড়িত কৰি ৰখা ‘প্ৰান্তিক’ আলোচনীখন ১৯৮১ চনৰ পৰাই প্ৰকাশিত হৈ আছে চানমাৰিৰ পৰা৷

১৭৷ গুৱাহাটীত বছৰি শ শ দুৰ্গা পুজা অনুষ্ঠিত হ’লেও মাত্ৰ কেইখনমান ঠাইতহে স্থায়ী দুৰ্গা মন্দিৰত পূজা অনুষ্ঠিত হয়৷ সেই সমূহৰ ভিতৰত অন্যতম চানমাৰি উৰণ সেঁতুৰ তলত অৱস্থিত দুৰ্গা মন্দিৰটো৷

১৮৷ ১৯৭৪ চনৰে পৰা অসমৰ শিল্পকলাৰ আগৰণুৱা সংস্থা হিচাপে সক্ৰিয় হৈ আছে গুৱাহাটী আৰ্টিষ্ট গীল্ড৷ ইয়াৰ মূল চৌহদ অৱস্থিত চানমাৰি উৰণ সেঁতুৰ দাঁতিতে৷

ফটো বনজিৎ বৰ্মন

Comments

লাহে লাহে তেওঁৰ প্ৰতি মোৰ আকৰ্ষণ বাঢ়ি আহিছিল

উচ্চতৰ মাধ্যমিকত নামভৰ্তি হোৱাৰ পাছত মই নজনাকৈয়ে পঢ়াৰ ধাউতি বাঢ়ি গৈছিল।…

আমাৰ নিঠৰ দেহ বিচাৰি নাপালেহেঁতেন

আন দহজনে নকৰা কিছু কাম কৰাৰ মন সৰুৰে পৰা আছিল যদিও সময়, সুবিধা…

সেই দিনটোৰ পৰা বিহু সন্মিলনলৈ যোৱা নাই

১৯৬৬ চনৰ কথা ৷ সেই সময়ত ড: ভূপেন হাজৰিকাৰ নাম চাৰিওফালে ৰজনজনাই আছিল…