কুইজৰ ছলেৰে জ্ঞানৰ পৰিমাপ (প্ৰশ্ন : নৱজ্যোতি ভৰালীৰ )

কোৱ পো (Kuo Po) নামৰ চীনা পণ্ডিত এজনে ৩৫০ খ্ৰীষ্টাব্দত লিখা চীনৰ অভিধান এখনত উল্লেখ আছে যে চীন সাম্ৰাজ্যতে প্ৰথমে চাহক খাদ্যৰূপে ব্যৱহাৰ কৰিছিল। ইযাক চীনাসকলে কি বুলিছিল?

কৰম পূজাৰ কাম সমাপন কৰি পুৰোহিতগৰাকীক কৰমতীয়ে সেৱা কৰি মান ধৰে। মান ধৰাৰ পাছত পুৰোহিতে কৰমতীসকলৰ লগত প্ৰাৰ্থনামূলক গীতেৰে ঝুমইৰ আখৰা নাচৰ অনুষ্ঠান মুকলি কৰা হয়। আখৰা মুকলিত বাগদেৱী সৰস্বতী আৰু ভগৱানক প্ৰাৰ্থনা কৰি এনেদৰে গীত পৰিৱেশন কৰে—
আখৰা বন্দনা কৰি
সৰস্বতী মাইগ বলি
তবেৰে বন্দনা ব্ৰজনাৰী
মদনে ঝুমইৰ লাগল ভাৰী
এই ধৰণৰ ঝুমইৰ আখৰা মুকলি কৰা গীতসমূহক কি গীত বোলা হয় ?

ঝুমইৰ নাচত দুটা বা তিনিটা গীত পৰিৱেশনৰ পাছত এটি খেমটা গীত পৰিৱেশন কৰে। এই গীতবিলাক চুটি চুটি আৰু নাচ অতি দ্ৰুত গতিত চলে৷ অধিক দ্ৰুত কৰিবৰ বাবে মাজে মাজে ‘ত্ৰা-নানা-নাইৰে নাইৰে ত্ৰানা নাইৰে-নাইৰ গ’ লয় দিয়া হয়। এই ঝুমইৰ গীতৰ মাজত দিয়া লয় বিলাকক কি বোলে ?

বন্দনা, ডাঁড়শালীয়া, ঝিঙাফুলীয়া, গলৱাৰী, খেমটাবাৰং আৰু ভিনসৰীয়া-এই সমূহৰ মাজৰ মিলটো কি ?

চাহ জনগোষ্ঠীৰ সমাজত দিপাৱলীত গৰুক পূজা কৰা হয়। এই পূজাত গৰুক সেৱা-সৎকাৰ কৰা হয়। পূজাৰ পাছদিনা হাঁহ-কুকুৰা কাটি পূজা দিয়া হয়, ইয়াক বহুতে গোৱৰ্দ্ধন পূজা বোলে৷ এই পূজাত এবিধ বিশেষ ধৰণৰ গীত পৰিৱেশন কৰা হয়৷ এই গীতবোৰক কি বোলে ?

চাহ জনগোষ্ঠীৰ মাজত প্ৰচলিত এই পূজা কৰিবলৈ পাঁচজনীয়া এটা দল থাকে। য’ত এজন গায়ক, এজন বায়ন, এজন শ্ৰীপালীয়া (গায়কৰ মুখ্য সহায়ক) আৰু দুই তিনিজন সাধাৰণ পালীয়া থাকে। চাহ জনগোষ্ঠীৰ মাজত প্ৰচলিত এই পূজাৰ নামটো কি ?

অসমৰ সকলো চাহ বাগিছাত প্ৰচলিত এই সময়। এই সময় প্ৰচলন কৰিছিল ব্ৰিটিছসকলে। এই সময়ক স্থানীয় সময় (local time) বা বাগান টাইম বোলা হয়। এতিযা প্ৰশ্নটো হল এই স্থানীয় সময় বা বাগান টাইম কি ?

অসমৰ বিভিন্ন প্ৰান্তৰ চাহ বাগিছাত চাহ জনগোষ্ঠীৰ লোকসকল কৰ্মৰত। এই কৰ্মৰত চাহ জনগোষ্ঠীৰ বনুৱাসকল দুই প্ৰকাৰৰ- স্থায়ী আৰু অস্থায়ী বনুৱা। চাহ বাগিছাত কৰ্মৰত স্থায়ী বনুৱাসকলক চাহ জনগোষ্ঠীয় ভাষাত কি বোলা হয় ?

পৰিৱেশ সংৰক্ষণৰ বাবে হোৱা বিভিন্ন আন্দোলনৰ ভিতৰত এই আন্দোলনো উল্লেখনীয়। ১৯৭০ চনত ‘অলকানন্দা’ উপত্যকাত হোৱা এই আন্দোলনটিৰ নামৰ অৰ্থ সাৱটি ধৰা। প্ৰশ্নটো হল, আন্দোলনটিৰ নাম কি ?

পয় চাংকেন, পয় কিথিং, পয় অকৱা, পয় মৌ হেইং, মাইক’ চুমফাই। এই উৎসৱসমূহ অসমত বাস কৰা কোনটো জনগোষ্ঠীৰ মাজত প্ৰচলিত ?